اتعرفت على واحد محترم

انا اتعرفت علي راجل محترم وذا قيمه لكن متزوج عنده ٥٣ سنه لكن مش باين عليه محافظ علي نفسه

اول مره شوفته فيها قولت هو ده اللي انا عيزاه طول بعرض ..انا مطلقه وعندي ٣ اولاد وعندي ٤٩ سنه

اتعرفت علي بعض فتره وهو مراته وابنه عايشين برا عشان التعليم ومكنتش مرتاحين في مصر. .. وهو شغله في مصر لانه رجل اعمال

عرضت عليه الجواز ..في الاول رفض وقالي احنا اصدقاء وانا بحب مراتي

فضلت وراه وسهلت له كل حاجه مش هيجيب عفش ولا شقه ولا هيصرف عليا واقنعته ووافق بس مجبش اهله وانا طلبت الجواز عرفي عشان فلوسي تروح لولادي من بعدي ..وهو طلب ان هيجيلي في الويك اند بس وقالي لو مراتي عرفت او وصل لها حاجه الجوازه هتبقي فركش

اتجوز.نا ادام اهلي كلهم وكان بيجيلي في الويك اند ونخرج نتفسح وكان لطيف واخلاق معايا وانا كمان كنت عايزه اخليه يحس كل شيء حلو معايا ..لما كان بيسافر لمراته كان مبيتصلش بيا خالص ولا بيبعت يطمن عليا كان بيقعد عندها اسبوعين كل شهرين يروح لها كنت بزعل وبغير وانه ازاي مش بيطمن عليا حتي برساله

وكنت بهدا لما يرجع …لحد بعد سنه من جواز.نا مراته اكتشفت صور لفرحنا انا كنت بعتاها له وطلبت الطلاق منه وحصل مشاكل بينهم وهو قال لها انه كان مغيب ومش عارف هو ازاي عمل كده وان انا سهلت كل حاجه له واستغليت انها مش موجوده معاه … وجه فعلا وكلمني في الانفصال كنت مدمره بس عرفت اخليه يتراجع عن قراره واننا نضحك عليها تاني ومش هبان خالص وكأنه طلقني

ودخلت علي مراته …مراته اصغر مننا بعشر سنين

وفضلنا ٧ شهور من غير ماتعرف ..بس هي كانت مراقبه صور الواتس بتاعي وانا معرفش ان رقمي عندها

لحد ما في يوم نزلت اسمي واسمه في قلب وكانت صوره الواتس دخلت بعتتلي كلام لو كانت شتمت كان اهون كلام اني رخيصه

بعدها اتغظت منها لاني انا مجرحتهاش بشيء وهو حقه يتجوز ومعملناش حاجه غلط …حتي هو وهو معايا وهي بتكلمه كان بيقفل معاها والاقيه زعلان كنت اسأله زعلان من ايه كان يقولي ازاي هي كويسه معايا وبتحبني وانا اعمل فيها كده ..كنت بقوله ده حقك وحلال الله

وبعد كلامها ليا مبقاش يهمني وبقيت ابعت له رسايل وهو عندها ومش هاممني تعرف بعد قله ادبها عليا

وهي لقت صور ليا بعتاها ليه منها صوره بوست هزار ج ن س ي

لما شافت الصور راحت بعتت ليا وشتمتني وقالتلي يا ز ا ن ي ه

وهو انكر ادامها اني مراته وكان مطلقني ادامها ٣ مرات في اوقات مختلفه عشان يسبت لها انه مطلقني …هي اللي قالتلي الكلام ده وبعتت لبنتي الكبيره ٢٠ سنه الصوره الخليعه وقالت لها امك الشمال

دخلت كلمتها وقولتلها جوزي زي ماهو جوزك ..وقولت لها اللي بتعمليه ده هيخرب بيتك وحرــ,,ـقتها وقولتلها متجوزاه من ٧ سنين انتي لسه فاكره تحسي مع انهم سنتين بس

وقولتلها هو ياحبيبتي لا هيسيبك ولا هيسبني واقبلي بالموضوع لانه بيحبني

مراته ضحكت وقالتلي مع انه غدر بيا واتجوز عليا بس عشان مش بيحبك لان انا عارفه اني حب عمره وهقولك اتجوزك ليه

قالتلي انه حد اذاهم من اربع سنين بسحر ربط وسحر فراق وعايشين مع بعض اخوات من اربع سنين وهي صبرت وهو صبر عشان بيحبو بعض .. وقالت لي هو كراجل صبر سنتين ومقدرش وانتي عرضتي نفسك ادامه ببلاش وهو لو كان متجوزك عشان الجواز كان عاش معاكي بس ده كان متفق معاكي ويك اند بس

وقالتلي كلام يجرحني ويرخصني وانا مش رخيصه انا كنت بحبه وده حلال الله انه يتجوز

مصدقتش كلامها … وكنت عارفه انه مش هيستغني عني

وبعد ما بعتتلي الكلام ده قعد معاها شهرين مبعتش فيهم ليا ولا رساله لحد ما بعتله انا قولت له لا كلام ولا عتاب انت تيجي لاهلي وتطلقني

قالي انتي عايزه كده

قولتله اه

قالي حاضر

انا قولت بيقولي حاضر لحد مايرجع من عند مراته ويجي يراضيني وكمان انا هرجع له بشروط زي زيها

مراته بعتت ليا رساله انه قالها اني طالبه الطلاق واني سهلت له الموضوع ..بس مصدقتهاش وقولت انها بتوقع

واتفجءت انا ابويا بيتصل بيا بيقولي ان جوزك طلب يقابلنا لانك عايزه الطلاق وكمان مراته عرفت وهو مش هيخسر بيته

ليه ظلــ,,ـمني ليه موقفش لمراته وقالها هو ده الوضع انا كنت عارفه انه بيحبني وميقدرش يستغني عني … ليه مسبهاش هي ليه اخترها هي

انا هتجنن

انا كنت بالنسباله ايه ؟؟ هو بيحبني وهو اتجبر منها علي انه يطلقني؟؟

عايزه رأيكم من غير تجريح ارجوكم اللي فيني مكفيني

انا بكرا اخر يوم في عدتي كنت مفكره انه هيكلمني بس محصلش

هل اكلمه انا احاول تاني معاه ؟؟